BMT Baş Assambleyasının 78-ci yüksək səviyyəli həftəsində Azərbaycanı xarici işlər naziri Ceyhun Bayramov təmsil edəcək. Bu barədə 24 avqust tarixində Report məlumat verib.
BMT Baş Assambleyasının 78-ci sessiyası 19 sentyabr tarixində Nyu-York şəhərində, BMT-nin mənzil qərargahında öz işinə başlayacaq.
Həmin gün BMT Baş Assambleyasının hazırkı rəhbəri, macarıstanlı diplomat Çaba Korosi 77-ci sessiyanı yekunlaşdıracaq.
BMT Baş Assambleyasının yeni sessiyasına Trinidad və Tobaqonun sabiq Baş naziri və BMT yanında daimi nümayəndəsi Denis Fransis rəhbərlik edəcək.
BMT-yə üzv olan 193 ölkədən dövlət və hökumət nümayəndələrinin qatılacağı yüksək səviyyəli həftə ənənəvi olaraq, sentyabrın 20-də başlayacaq.
Həftədə Türkiyə Prezidenti Rəcəb Tayyib Ərdoğan da iştirak edəcək.
Həftə ərzində Davamlı İnkişaf Məqsədləri üzrə fəaliyyətin sürətləndirilməsi, iqlim dəyişikliyi, qlobal istiləşmə, quraqlıq və yeraltı su mənbələrinin tükənməsi, Ukraynadakı müharibə, eləcə də dünyadakı qida çatışmazlığı, enerji böhranı və digər aktual məsələlər müzakirə olunacaq.
