COP29 Azərbaycan Əməliyyat Şirkəti COP29 Akademiyasının fəaliyyətə başladığını elan edib. Bu barədə İnsanoid Report-a istinadən bu gün, 14 iyun tarixində xəbər verir.
Akademiyanın fəaliyyətinin əsas məqsədi ekoloji maarifləndirmə və iqlim dəyişmələri istiqamətində gənclərin fəal iştirakının təmin edilməsidir.
Eyni zamanda Akademiyanın yaradılması təşəbbüsü iqlim və dayanıqlılıq mövzularında peşəkar səriştələr, liderlik, dərin bilik nümayiş etdirən və fərqlənən universitet məzunlarını tanımaq və dəstəkləməyi, ölkənin parlaq gəncləri vasitəsilə dayanıqlılığın əhəmiyyəti barədə cəmiyyətin məlumatlandırılmasını hədəfləyir.
Bu proqram iştirakçılara mentorluq, davamlı peşəkar inkişaf və özünü inkişaf üçün imkanları təklif etməklə iştirakçıların dayanıqlılıq sahəsində biliklərə yiyələnməsi, bu biliklərin həmyaşıdları, ailələri və ictimaiyyət ilə paylaşmaları üçün bir platforma rolunu oynayacaq.
COP29 sədrliyi bildirib ki, akademiya istənilən ixtisas sahəsi üzrə məzunların müraciətlərini qəbul edəcək və layihələrin idarə edilməsi, peşəkar davranış kodeksi və s. kimi bacarıqlara yiyələnmək üçün muvafiq mütəxəssislərin iştirakı ilə seminarlara qatılma imkanı yaradacaq. Akademiyanın iştirakçıları Əməliyyat Şirkəti tərəfindən işlə təmin edilərək COP29 tədbirinin təşkilinə işçi heyətinin üzvü qismində töhfə verməyə cəlb ediləcəklər.
Qeyd edək ki, 2023 və 2024-cü illərdə akkreditə olunmuş universitetlərdən məzun olan, Azərbaycan vətəndaşlığını daşıyan və əmək fəaliyyəti ilə məşğul olmayan, sosial aktiv, xarici dil bilikləri yüksək olan bütün namizədlər iyunun 22-dən ərizə formasını dolduraraq qeydiyyatdan keçə bilərlər. Proqram tələblərinə əsasən, seçilən namizədlər müsahibə mərhələsinə dəvət olunacaqlar.
