Bakıda tibb müəssisəsi həmin binanın yaxınlığında heyvan yemləyən vətəndaşları cərimələməklə hədələyib. Bu barədə martın 18-də Report məlumat yayıb.
“Heyvanlara müəssisənin pəncərələrinin önündə qida qoymaq qadağandır! Əks halda cərimə olunacaqsınız! Təmizliyə riayət edin! Bura tibb müəssisəsidir!”. Bu xəbərdarlıq metronun “28 May” stansiyasının yaxınlığında yerləşən Ailə Planlaması Məsləhətxanasının pəncərəsinə yapışdırılıb.
Məsələ ilə bağlı müəssisədən bildirilib ki, xəbərdarlığın yazılma səbəbi heyvanlara qoyulan qidanın müəssisənin pəncərələrinin önünü çirkləndirməsi və xoşagəlməz qoxunun yaranmasıdır. Cəriməyə gəldikdə isə bunu insanları “qorxutmaq” məqsədilə etdiklərini deyiblər.
Vəkil Rəşad Əliyev bu məsələyə münasibət bildirib: “Həmin qurumun bu formada xəbərdarlıq yazmaq və ya cərimə tətbiq etmək hüququ yoxdur. Hansısa ərazinin çirkləndirilməsi, məişət tullantılarının atılması olduğu halda, cərimə yazmaq daxili işlər orqanlarına aiddir”.
Qeyd olunub ki, material dərc edilənə qədər sözügedən elan başqa mətnlə əvəzlənib.
[gallery columns="1" size="full" ids="37743"]
