Dələduzluqda təqsirləndirilən şirkət rəhbəri Məhərrəm Məhərrəmov 7 il müddətinə azadlıqdan məhrum edilib. Bu barədə 25 avqust tarixində Report məlumat verib.
Bakı Ağır Cinayətlər Məhkəməsində şirkət rəhbərinə hökm oxunub.
Dövlət ittihamçısı təqsirləndirilən şəxs Məhərrəm Məhərrəmovun 8 il azadlıqdan məhrum edilməsini istəmişdi.
İttihama görə, “Şans” MTK-nın təsisçisi olmaqla yanaşı, faktiki rəhbəri olmuş Məhərrəm Məhərrəmovun 2018-2021-ci illərdə rəhbərlik etdiyi kooperativlər tərəfindən inşa olunmuş yaşayış binalarındakı 17 mənzilin saxta müqavilə və maliyyə arayışları ilə 36 nəfər şəxsə, eləcə də satılması qanunvericiliklə qadağan edilən 7 qeyri-yaşayış sahəsinin mənzil qismində eyni üsulla 14 nəfər şəxsə sataraq ümumilikdə vətəndaşlara məxsus 3 milyon 166 min manat məbləğində pul vəsaitini ələ keçirməsinə əsaslı şübhələr müəyyən edilib.
İş üzrə toplanan kifayət qədər sübutlar əsasında Məhərrəm Məhərrəmova Cinayət Məcəlləsinin “dələduzluq külli miqdarda ziyan vurmaqla törədildikdə”, “vəzifə səlahiyyətlərindən sui-istifadə ağır nəticələrə səbəb olduqda” və “vəzifə saxtakarlığı” maddələri ilə ittiham elan edilməklə barəsində məhkəmənin qərarı ilə həbs qətimkan tədbiri seçilib.
