Dövlət Sərhəd Xidməti və Dövlət Təhlükəsizliyi Xidməti birgə əməliyyat keçirib. Bu barədə İnsanoid Dövlət Sərhəd Xidmətinin Mətbuat Mərkəzinə istinadən bu gün, 25 iyun tarixində məlumat verir.
Xəzər dənizindən dövlət sərhədini pozmaqla Azərbaycan Respublikası ərazisinə külli miqdarda narkotik vasitəni keçirməyə cəhd göstərən mütəşəkkil qaçaqmalçı qrupun üzvləri saxlanılıblar.
Məlumata görə, iyun ayının 25-də saat 00:17-də Sahil Mühafizəsinin Baş Komanda Nəzarət Mərkəzi tərəfindən Xəzər dənizinin Xızı rayonu ərazisində sahildən 500 metr məsafədə Şorabad qəsəbəsi istiqamətində sürətlə hərəkət edən 2 ədəd naməlum üzmə vasitəsi müşahidə edilib.
Aşkarlanmış hədəflərin saxlanılması məqsədi ilə təqibetmə əməliyyatına başlanılıb.
Uzun sürən təqiblər nəticəsində saat 02:48-də sərhədçilərin qanuni tələblərinə tabesizlik göstərərək narkotik vasitələri dənizə atıb ərazidən uzaqlaşmağa cəhd edən sərhəd pozucularına qarşı silah tətbiq edilib.
Nəticədə layner tipli itisürətli üzmə vasitələrindən biri 2 nəfər heyət üzvü ilə birlikdə saxlanılıb, ikinci üzmə vasitəsinin isə heyət üzvlərindən biri saxlanılsa da, digəri itkin düşüb.
Yaralı sərhəd pozucularına ilkin tibbi yardım göstərildikdən sonra ixtisaslaşmış tibb müəssisəsinə təxliyə ediliblər.
Araşdırma zamanı saxlanılan şəxslərin İran İslam Respublikası vətəndaşları - Gülüstan əyalətinin Bender-Türkmən şəhər sakinləri: 40 yaşlı Behman Qasim, Rəhim Ounek Anna, 41 yaşlı Nuri Nurməmməd Bəhrəmxalid olduqları, dövlət sərhədini narkotik vasitələri qeyri-qanuni yolla ölkə ərazisinə keçirmək məqsədi ilə pozduqları müəyyən edilib.
Davam edən əməliyyat tədbirləri nəticəsində İran İslam Respublikasının mütəşəkkil qaçaqmalçı qrupunu qarşılamaq niyyəti ilə həmin əraziyə dənizin sahilinə gəlmiş Azərbaycan Respublikası vətəndaşları - 42 yaşlı Elxan Əliyev və 48 yaşlı Esmira Məmmədova saxlanılıblar.
Hazırda Dövlət Sərhəd Xidməti Sahil Mühafizəsinin sərhəd gözətçi gəmiləri və dalğıclar tərəfindən digər itkin düşmüş sərhəd pozucusu, İran İslam Respublikasının 39 yaşlı vətəndaşı Həmid Vəkilinin və dənizə atılmış digər maddi sübutların axtarışı həyata keçirilir.
Fakt üzrə Baş Prokurorluqla birgə əməliyyаt-istintaq və axtarış tədbirləri dаvаm еtdirilir.
