Almaniyada dərc edilən və Avropanın nüfuzlu nəşrlərindən olan “Juedisches Europa” jurnalı Azərbaycan-İran münasibətləri haqda analitik məqalə dərc edib. Bu barədə 3 noyabr tarixində AZfront məlumat yayıb.
Məqalədə İranın Azərbaycan və İsrail əməkdaşlığına görə qıcıqlanmasından bəhs edilir.
Sözügedən mövzu ilə bağlı məqalədə göstərilən əsas məqamlar aşağıdakılardır:
- Azərbaycan və Aİ arasında enerji sektorunda artan əməkdaşlıq İran, Rusiya Federasiyası və Ermənistan üçün təhlükə yaradır;
- İran Azərbaycana qarşı hədə-qorxu strategiyası həyata keçirir. Nəşr AZfront-a istinadən qeyd edir ki, rəsmi Tehran Naxçıvan Muxtar Respublikasının Azərbaycandan ayrılmasında maraqlıdır;
- Rusiyanın Ukraynaya qarşı təcavüzü “hərbi təlimlər”dən başlayıb. Buna görə də İran İslam İnqilabı Keşikçiləri Korpusunun və İran quru qüvvələrinin Azərbaycanla sərhəddə keçirdiyi təlimlər real təhlükə kimi qəbul edilməlidir;
- Krımın ilhaqından (zorla birləşdirilməsindən) əvvəl Rusiya Federasiyası bu ərazinin “geri qaytarılması” üçün fəal şəkildə təbliğat aparırdı. Odur ki, İranın Naxçıvanın ilhaqına yönəlmiş təbliğatına da ciddi yanaşmaq lazımdır;
- Hərbi qarşıdurma olarsa, Azərbaycan 2016-cı ildən ölkəyə tədarük edilən İsrail silahlarından istifadə edəcək.
