Ermənistan Azərbaycanın iki dövlət arasında münasibətlərin normallaşması üçün təqdim etdiyi beş prinsipi qəbul edib. Bunu Prezident İlham Əliyev aprelin 9-da Vladimir Putinlə telefon danışığı zamanı bildirib.
Danışıq zamanı sülh müqaviləsinin hazırlanması üzrə işçi qrupunun yaradılması barədə söhbət aparılıb.
Həmçinin nəqliyyat məsələləri üzrə Azərbaycan, Rusiya və Ermənistanın iştirak etdiyi işçi qrupunun fəaliyyəti və bu çərçivədə növbəti təmaslar haqda bəhs edilib.
Qeyd edək ki, martın 14-də xarici işlər naziri Ceyhun Bayramov Antalya Diplomatiya Forumunda iştirak edib. O çıxışında 5 baza prinsipləri haqda məlumat verib:
- Dövlətlərin bir-birlərinin suverenliyi, ərazi bütövlüyü, beynəlxalq sərhədlərinin toxunulmazlığı və siyasi müstəqilliyini qarşılıqlı şəkildə tanıması;
- Dövlətlərin bir-birlərinə qarşı ərazi iddialarının olmamasının qarşılıqlı təsdiqi və gələcəkdə belə bir iddianın qaldırılmayacağına dair hüquqi öhdəliyin götürülməsi;
- Dövlətlərarası münasibətlərdə bir-birlərinin təhlükəsizliyinə hədə törətməkdən, siyasi müstəqillik və ərazi bütövlüyünə qarşı hədə və gücdən istifadə etməkdən, habelə BMT Nizamnaməsinin məqsədlərinə uyğun olmayan digər hallardan çəkinmək;
- Dövlət sərhədinin delimitasiyası və demarkasiyası, diplomatik münasibətlərin qurulması;
- Nəqliyyat və kommunikasiyaların açılışı, digər müvafiq kommunikasiyaların qurulması və qarşılıqlı maraq doğuran digər sahələrdə əməkdaşlığın qurulması.
