“Fövqəladə Hallar Könüllüləri” proqramına qeydiyyat başlanılır. Bu barədə 24 iyul tarixində Azərbaycan Könüllü Təşkilatları İttifaqı məlumat yayıb.
Proqram Fövqəladə Hallar Nazirliyi və Azərbaycan Könüllü Təşkilatları İttifaqının birgə təşəbbüsü və tərəfdaşlığı ilə təşkil olunur. Onun məqsədi fövqəladə hallara hazırlıq, o cümlədən təbii və texnogen xarakterli fövqəladə halların qarşısının alınması və nəticələrinin aradan qaldırılması ilə əlaqədar gənclərin dəstəyindən faydalanmaqdır.
Proqrama qoşulmaq üçün 18-35 yaş arası şəxslər müraciət edə bilərlər. Onların təhsil səviyyəsi vacib deyil.
İlkin qeydiyyat və müsahibə mərhələlərini keçmiş iştirakçılar Azərbaycan Respublikası Fövqəladə Hallar Nazirliyinin mütəxəssisləri tərəfindən yanğın təhlükəsizliyi, mülki müdafiə, axtarış-xilasetmə işi, ilk yardım, ilkin psixoloji yardım, su hövzələrində təhlükəsizlik, fövqəladə hallar zamanı davranış qaydaları və digər sahələr üzrə təlimlər keçəcəklər.
Təlimləri uğurla bitirmiş könüllülərə proqramın sonunda müvafiq sertifikatlar veriləcək.
Proqramda iştirak etmək istəyənlər 31 avqust 2023-cü il tarixinədək link-ə daxil olmaqla müraciət edə bilərlər.
