Fransa Senatının altı üzvü tərəfindən irəli sürülən, Azərbaycana qarşı qərəzli ittihamların yer aldığı, eləcə də Fransa və digər Aİ ölkələrini Azərbaycandan neft və qaz idxalına embarqo qoymağa çağıran ermənipərəst qətnamə layihəsinə etiraz olaraq, Türkiyənin Ankara şəhərində etiraz aksiyası keçirilib.
Bu barədə 7 noyabr tarixində AZƏRTAC məlumat verib.
Məlumata əsasən, aksiya iştirakçıları əllərində Türkiyə və Azərbaycanın dövlət bayraqları, Ermənistanın işğalçılıq siyasətinin nəticələrini əks etdirən fotoplakatlar, Fransanın Azərbaycan və Türkiyə əleyhinə qərəzli mövqeyinə qarşı yazılar tutaraq ölkəmizi dəstəkləyən şüarlar səsləndiriblər.
Türkiyə Prezidenti yanında Təhlükəsizlik və Xarici Siyasət Şurasının üzvü, TADƏHF-nin rəhbəri professor Aygün Attar aksiya iştirakçılarının etiraz bəyanatını oxuyub. Etirazçılar adından səfirliyə etiraz bəyanatı təqdim olunub.
