Bu gün Zamoskvoretski məhkəməsində Moskvadakı Fransa səfirliyinin önündə azərbaycanlıların keçirdikləri aksiya zamanı saxlanılan 4 qadının məhkəmə prosesi baş tutub. Bu barədə AZfront məlumat yayıb.
Tutulan qadınlardan biri Moskva şəhərinin İH orqanları ilə razılaşdırılmamış piketi təşkil etməkdə, digər üç nəfər isə burada iştirak etməkdə ittiham olunublar. Nəticədə, birincisi 20.000 rubl, digərlərinin hər biri isə 15.000 rubl məbləğində cərimələniblər.
Bununla da məhkəmə işi yekunlaşıb.
Qadınların dördü də oktyabrın 19-u Fransanın Moskvadakı səfirliyi qarşısında 15 noyabr tarixinə təyin olunan həmin ölkənin Senatının anti - Azərbaycan qətnamə layihəsinə qarşı keçirilən aksiya zamanı saxlanılmışdırlar. 15 oktyabr tarixində isə bu cür aksiya Fransanın Bakıdakı səfirliyi önündə keçirilmişdir. Piket iştirakçıları əllərində Ermənistan tərəfindən raket atəşləri nəticəsində həlak olmuş uşaqları simvolizə edən paltarları qırmızı rəngdə boyanmış kuklalar tuturdular. Həmçinin qadınlar həlak olmuş uşaqların adları və şəkillərini, eləcə də hücuma məruz qalan şəhərlərin adlarını əks etdirən plakatları və Azərbaycan xalqı adından Fransa Senatına və xalqına ünvanlanmış petisiyanı dəstəkləyən transparantlar nümayiş etdiriblər.
Sözügedən petisiya 11 oktyabr tarixində Fransanın Mesopinions.com saytında yerləşdirilib. Oktyabrın 25-i, yəni cəmi iki həftə ərzində isə səs verənlərin sayı artıq 39.000-i keçib.
