Səhər saatlarında Gəncə şəhər 8 nömrəli tam orta məktəbin qabağında bıçaqlanma olub. Bu barədə 23 yanvar tarixində APA Gəncə-Daşkəsən Regional Təhsil İdarəsinin İnzibati təşkilat sektorunun müdiri Azər İbrahimova istinadən məlumat verib.
Kənar şəxs məktəbə daxil ola bilməyərək geri qayıdarkən məktəbin 2007-ci il təvəllüdlü şagirdi Rəhimov Raul Bəxtiyar oğlu ilə aralarında mübahisə yaranıb.
A.İbrahimov bildirib ki, nəticədə həmin şəxs şagirdə bıçaq zərbəsi vurub. “Hadisədən sonra dərhal təcili tibbi yardım çağırılaraq şagird xəstəxanaya çatdırılıb. Lakin şagirdin həyatını xilas etmək mümkün olmayıb. Qeyd edək ki, hadisəni törədən şəxs əvvəllər məktəbin şagirdi olub. Lakin valideynin ərizəsi ilə şagird kontingentindən çıxarılıb. O, hazırda məktəbdə təhsil almır. Bizdə olan məlumata görə, hadisə məktəbin qarşısında olub”.
Şübhəli bilinən 2007-ci il təvəllüdlü F. Şabanov saxlanılaraq istintaqa təqdim edilib.
Faktla bağlı “qəsdən adam öldürmə” maddəsilə cinayət işi başlanıb.
