Gəncədə vətəndaşlar qanunsuz saxlanılan silahlarını polisə könüllü təhvil veriblər. Bu barədə İnsanoid DİN-in Mətbuat Xidmətinə istinadən bu gün, 1 dekabr tarixində xəbər verib.
Gəncə polisi qanunsuz saxlanılan silah-sursatın aşkarlanaraq götürülməsi və gələcəkdə baş verə biləcək cinayətlərin qarşısının alınması istiqamətində əməliyyat-axtarış və profilaktiki tədbirləri davam etdirir. Əməliyyat yolu ilə aşkarlanan silahlardan başqa, mütəmadi olaraq vətəndaşlarla profilaktiki söhbətlər aparılaraq bildirilib ki, müvafiq sənədləri olmayan odlu silahların saxlanılması məsuliyyət yaratsa da, könüllü təqdim etmə şəxsi məsuliyyətdən azad edir.
Keçirilən müvafiq tədbirlər nəticəsində 25 nəfər şəhər sakini müvafiq sənədləri olmayan, müxtəlif marka və kalibrli ov silahlarını polisə könüllü təhvil verib. Hər bir vətəndaşla bir daha fərdi söhbət aparılaraq bildirilib ki, onların Daxili İşlər Nazirliyinin gizlədilən döyüş və ov silahlarının, partlayıcıların və sursatların könüllü polisə təhvil verilməsi ilə bağlı çağırışına həssas yanaşması və bu çağırışa qoşulması təqdirəlayiq haldır.
Təqdim edilən hər bir silah müvafiq ekspertizaya təqdim edilib, faktlarla bağlı araşdırmalar davam etdirilir.
