Rəqəmsal İnkişaf və Nəqliyyat Nazirliyinə məxsus “Azərpoçt” MMC Heydər Əliyevin 100 illik yubileyinə həsr olunmuş poçt markalarını dövriyyəyə buraxıb. Bu barədə 1 dekabr tarixində Nazirlik məlumat verib.
Məlumata görə, markalar müxtəlif kateqoriya üzrə hazırlanıb və iki dövlətdə çap olunub. Bu markalar arasında 1 markadan ibarət blok məhdud sayda, cəmi 2 000 tirajla, hər biri özəl nömrələnmiş Almaniyanın Berlin şəhərində yerləşən “Bundesdruckerei” nəşriyyat evində çap olunub.
Poçt blokunun üzərində H.Əliyevin fotosu və onun “Mən həmişə fəxr etmişəm, bu gün də fəxr edirəm ki, mən azərbaycanlıyam” sitatı qızılı folqa və basma üsulu ilə çap olunub. Markanın nominal dəyəri 10 manat təyin olunub. Bundan əlavə, markanın üzərinə Azərbaycanda ilk dəfə olaraq “QR-kod” yerləşdirilib, 300 000 tirajla 0,50 qəpik nominalı olan poçt markası Almaniyada çap olunub və dövriyyəyə buraxılıb. H.Əliyev haqqında məlumatın əcnəbilər arasında geniş yayılması üçün “QR-kod”a H.Əliyev haqqında https://president.az/ saytında ingilis dilində yerləşdirilmiş məlumata keçid verilib.
