İlham Əliyev Gürcüstanda səfərdə olarkən Zurabişvili onunla hansı səbəbdən görüşməyib?

Azərbaycan dövlət başçısının Gürcüstana səfəri zamanı iki ölkə prezidentinin görüşü baş tutmayıb.

AZfront-un məlumatına istinadən, bununla bağlı Zurabişvili ictimaiyyət qarşısında özünü doğrultmaq istəyərkən bildirdi ki, İlham Əliyevin gəlişindən xəbəri yox idi. Qəribə səslənir. Necə ola bilər ki, Xarici İşlər Nazirliyi qonşu dövlətin başçısının səfəri barədə ölkə prezidentini məlumatlandırmasın?

Onların görüşünün baş tutmamasının səbəbi kimi Fransa Xarici İşlər Nazirliyinin (keçmiş) əməkdaşı Zurabişvilinin son illərdə Gürcüstan-Azərbaycan münasibətlərində dağıdıcı rol oynadığı bildirilir.

Yuxarıda qeyd edilənləri daha aydın buradan görmək olar:

• 2019-cu ilin fevral ayında Zurabişvili prezident ikən Azərbaycana səfər etdi. Öz növbəsində qarşı tərəf Prezident Əliyevi Gürcüstana cavab səfərinə dəvət etdi. Lakin 2019-cu ilin aprelində Zurabişvili Azərbaycanla heç bir razılaşma olmadan bir qrup jurnalist və qərbyönümlü QHT funksionerlərinin müşayiəti ilə qəfildən Qafqaz Albaniyasının Keşikçidağ monastır kompleksini ziyarət etdi. Azərbaycan buranı öz ərazisi hesab edir. Adıçəkilən ərazi Sovet dövrünün inzibati bölgüsünə görə, AzSSR-in tərkibində olub. Müvafiq topoqrafik xəritələr hələ 1963-cü ildə Gürcüstanın Ali Soveti tərəfindən təsdiq edilib. Ona görə də Zurabişvilinin Bakı ilə razılaşdırılmamış səfəri iki qonşu, dost ölkə arasında gərginlik yaratmaq məqsədilə təxribat kimi qəbul edilib. Təbii ki, həmin hadisədən sonra İlham Əliyevin Tbilisiyə cavab səfəri qeyri-müəyyən vaxta (nəticədə 4 ilə yaxın) təxirə salındı.


• 2022-ci ilin sentyabrında, Azərbaycan və Ermənistan sərhədində vəziyyətin gərginləşməsindən dərhal sonra Zurabişvili birmənalı olmayan reaksiya verdi, lakin fikir bildirməsə idi, daha yaxşı olardı.

Qeyd olunanlara əsaslanaraq, Azərbaycan tərəfi iki prezidentin görüşünün keçirilməsini lazımsız və yersiz hesab edib. Ən azından ona görə ki, Zurabişvilinin rəsmi Bakıya münasibəti Tbilisinin maraqlarından daha çox Parisin üstünlüklərini əks etdirir.

Salome Zurabişvili Parisdə anadan olub. Keçmişdə Fransanın ABŞ-dəki səfirliyinin birinci katibi, Fransanın NATO-dakı missiyasının birinci katibi, Fransa Xarici İşlər Nazirliyinin keçmiş müfəttişi, 2000-ci illərdə - Fransa Milli Müdafiə Baş Katibliyinin beynəlxalq məsələlər və strategiya üzrə rəhbəri vəzifəsində çalışıb. Onun yaxın qohumu (Helene Carrer-d'Encausse) Fransa Elmlər Akademiyasının katibidir.