Azərbaycan Respublikasının Prezidenti İlham Əliyev Serbiya Respublikasının Prezidenti Aleksandar Vuçiçə başsağlığı verib. Bu barədə 5 may tarixində Report məlumat verib.
Mətndə deyilir:
"Hörmətli cənab Prezident,
Belqrad şəhərində yerləşən məktəbdə baş vermiş dəhşətli faciə barədə xəbəri dərin sarsıntı və kədər hissi ilə qarşıladıq.
Bu ağır anlarda dərdinizi bölüşür, Sizə, həlak olanların ailələrinə və yaxınlarına, bütün Serbiya xalqına öz adımdan və Azərbaycan xalqı adından dərin hüznlə başsağlığı verir, yaralananların tezliklə sağalmasını arzulayıram".
Qeyd edək ki, mayın 5-i Serbiyada bir gəncin avtomobildən atəş açması nəticəsində 8 nəfər ölüb, 13 nəfər yaralanıb. Hadisə Mladenovats şəhər icmasının Dubona və Şepşin kəndlərində baş verib. Belə ki, 21 yaşlı Uros B. Dubona məktəbinin həyətində polis əməkdaşı ilə mübahisə edib. Mübahisədən sonra Uros B. evdən odlu silahı götürərək polisi və onun bacısını qətlə yetirib. Daha sonra o, Şepşin kəndində insanları atəşə tutmaqda davam edib.
