Cari ilin mart ayında İranda saxlanılan Naxçıvan Muxtar Respublikasının Şərur rayon sakinləri Vüsal Quliyev və Rövşən Seyidov sərbəst buraxılıblar. Bu barədə 19 avqust tarixində APA xəbər yayıb.
Həmyerlilərimiz ötən gün 5 ay saxlanıldıqları həbsxanadan buraxılıblar və Vətənə qayıdıblar.
Qeyd edək ki, mart ayının 21-də bu ölkəyə Türkiyənin Doğu Bəyazid ərazisindən keçən vətəndaşlarımız elə həmin gün orada həbs olunmuşdular. Əvvəlcə Poldəşt şəhərində həbs olunan Vüsal və Rövşən daha sonra Maku şəhərinə aparılaraq orada İran təhlükəsizlik orqanlarının zindanında saxlanılıblar.
İyul ayında isə onlar məhkəmə üçün Xoy şəhərinə gətiriliblər. Məhkəmənin qərarı ilə Vüsala 4 ay, Rövşənə isə 6 ay həbs cəzası verilib. 4 aylıq həbs müddəti bitdiyinə görə sərbəst buraxılmalı olan Vüsal Quliyev və Rövşən Seyidov məhkəmədən sonra İran təhlükəsizlik orqanları tərəfindən yenidən həbs olunmuşdular.
