Bakı şəhəri Sabunçu rayonunun Ramana qəsəbəsində, Qaradağ rayonunun Ümid qəsəbəsində, Binəqədi rayonunun Хocəsən qəsəbəsində, Abşeron, Lənkəran və Samux rayonlarında keçmiş məcburi köçkünlər üçün inşa edilmiş çoxmənzilli binalarda, həmçinin Bakı şəhəri Sabunçu rayonunun Kürdəxanı qəsəbəsində və Abşeron rayonunda inşası davam etdirilən çoxmənzilli binalarda yerləşən mənzillər satışa çıxarılacaq. Bu haqda 11 aprel tarixində Prezident İlham Əliyev Fərman imzalayıb.
Mənzillərin satışı Əmək və Əhalinin Sosial Müdafiəsi Nazirliyi tərəfindən həyata keçiriləcək. Satış onlayn qaydada və hərrac vasitəsilə reallaşacaq. Elan satışın başlanmasına ən azı 15 gün qalmış veriləcək.
Mənzilləri almaq istəyən şəxslər Vahid Giriş Sistemindən (“ASAN Login”) istifadə etməklə qeydiyyatdan keçməlidirlər.
Seçimdə iştirak edən hər bir şəxs bir neçə mənzil seçmək hüququna malik olacaq.
