Vaxtilə biz torpaqlarımızı işğaldan azad edəndə və məşhur “Bayraktar” dronlardan istifadə edəndə xarici ekspertlər və mətbuat bunu ölüm silahı kimi qələmə verirdi. İndi isə Rusiya-Ukrayna müharibəsində bunu mələk adlandırırlar. Fərq budur, ikili standartlar budur, bizə qarşı ədalətsizlik budur. Bu fikri Prezident İlham Əliyev 12 aprel tarixində 2022-ci ilin birinci rübünün yekunlarına həsr olunan müşavirədə bildirib.
Prezident müharibədən sonra beynəlxalq fondların ölkəmizə maliyyə yardımı ayırmamasından da danışıb: “Biz azad edilmiş torpaqları 100% öz gücümüzlə bərpa edirik”.
“Bəli, xarici şirkətləri dəvət etmişik. Onlar orada podratçı kimi işləyir. Amma bu günə qədər heç kimdən bir manat almamışıq. Ancaq öz gücümüzə, öz istedadımıza güvənirik”, - deyə ölkə başçısı söyləyib.
O qeyd edib ki, adətən, belə qanlı müharibələrdən, belə dağıntılardan sonra donor konfransları, beynəlxalq təşkilatlar yığışır və bərpa planı icra edilir. Lakin Azərbaycana nə işğal dövründə, nə də sonra yardım göstərilməyib.
Dövlət rəhbəri minaların təmizlənməsi ilə bağlı məsələyə də toxunub: “Müharibədən sonra 200-dən çox insan ya həlak olub, ya da ağır yaralanıb. Dünyada bu məsələ ilə məşğul olan o qədər fondlar var, QHT-lər var. Nə ilə məşğuldurlar? Gəlsinlər, kömək göstərsinlər”.
Sonda İlham Əliyev beynəlxalq təşkilatları ikili standartlardan kənar olmağa və Azərbaycana da diqqət yetirməyə səsləyib.
