Lənkəranda keçirilən əməliyyatlar zamanı silah-sursat və narkotik aşkarlanıb. Bu barədə İnsanoid Daxili İşlər Nazirliyinin (DİN) Mətbuat Xidmətinə istinadən bu gün, 30 may tarixində xəbər verir.
Lənkəran polisi rayonun Balıqçılar qəsəbəsinin sakini Samir Ağakişiyevi saxlayıb.
Keçirilən baxış zamanı onun üzərindən heroin və metamfetamin, yaşadığı evdən isə AK-74 markalı avtomat silahı, həmin silaha aid 1 ədəd daraq və 10 ədəd 5.45 mm çaplı patron aşkarlanaraq götürülüb.
Lənkəran şəhərinin "Ləvəngi dairəsi" ərazisində xidmət aparan şöbənin dövlət yol polisi bölməsinin əməkdaşları tərəfindən saxlanılan “KİA Optima” markalı avtomobilin sürücüsünün narkotik vasitənin təsiri altında olmasına dair şübhələr yarandığından onun müvafiq tibbi müayinədən keçirilməsi təmin edilib.
Müayinənin nəticəsinə əsasən, narkotik vasitənin sərxoşluğu altında olduğu müəyyən edilən sürücü, Masallı rayon sakini Vaqif Tağıyevin üzərinə keçirilən baxış zamanı 40 qram heroin, əlavə olaraq, metamfetamin aşkarlanaraq götürülüb.
İlkin araşdırma zamanı onun narkotik vasitəni şəxsiyyəti istintaqla araşdırılan “Səccad” adlı İran vətəndaşı vasitəsilə Bakı şəhərinin Binə qəsəbəsi ərazisində əldə etdiyi müəyyən edilib.
Faktlarla bağlı Lənkəran ŞRPŞ-də araşdırma aparılır.
