“Azərbaycanda bərpaolunan enerji növlərinin potensialı həddindən artıq böyükdür. Məhz buna görə dünyanın aparıcı enerji şirkətləri indi Azərbaycanla bu sahədə əməkdaşlıq etməyə çox maraqlıdırlar”. Bu sözləri martın 15-də İlham Əliyev Qaradağ Günəş Elektrik Stansiyasının təqdimolma mərasimində deyib.
Prezident qeyd edib ki, Azərbaycanın qeyri-neft sektoruna böyük həcmdə xarici sərmayənin qoyulması ölkənin əsas prioritetlərindən biridir.
“Biz dörd qonşu ölkəyə elektrik enerjisi ixrac edirik və əminəm ki, gələcəkdə digər bazarlara da çıxacağıq. Bunu nəzərə alaraq, hər bir yeni stansiyanın inşa olunması bizim ixrac imkanlarımızı da artırır. Azərbaycan nəinki xam neft, neft məhsulları və təbii qaz, eyni zamanda, elektrik enerjisinin böyük istehsalçısı və ixracatçısı olacaqdır”, – deyə dövlət başcısı bildirib.
O vurğulayıb ki, Azərbaycan elektrik enerjisini təbii qaz, su, günəş və külək kimi ekoloji cəhətdən təmiz mənbələrdən istehsal edir.
Həmçinin İlham Əliyev işğaldan azad edilmiş ərazilərin enerji potensialından da danışıb: “Artıq dəqiq hesablamalar aparılıb və günəş, külək enerji növlərinin istehsalı təxminən 9-10 min meqavata çata bilər”. Ölkə rəhbərinin sözlərinə görə, artıq bu istiqamətdə bp şirkəti ilə generasiya gücü 200 meqavatdan çox olan günəş elektrik stansiyasının inşası ilə bağlı danışıqlar gedir.
