Maaş almadığına görə həyat yoldaşını döyən şəxsin məhkəməsi sona çatdı. Bu haqda məlumatı İnsanoid bu gün, 13 yanvar tarixində Oxu.az-a istinadən verir.
Belə ki, Abşeron Rayon Məhkəməsində arvadını döyməkdə təqsirləndirilən Qabil Eyvazovun (ad şərtidir) cinayət işi üzrə məhkəmə istintaqı başa çatıb. Hakim Sevinc Quliyevanın sədrliyi ilə keçirilən prosesdə qərar elan olunub.
Qərara əsasən, icraata xitam verilib və o, cinayət məsuliyyətindən azad edilib.
Qeyd edək ki, hadisə Abşeron rayonunun Qobu qəsəbəsində yerləşən evlərin birində baş verib. 1982-ci il təvəllüdlü Qabil Eyvazov arvadı Gülay Eyvazova (ad şərtidir) ilə qadının yeni düzəldiyi iş yerindən maaşını alıb-almaması məsələsini müzakirə edib. Dərzi olan qadın isə hələ maaşının verilmədiyini söyləyib.
Daha sonra onların arasında mübahisə yaranıb. Bu zaman təqsirləndirilən şəxs yumruq və şillə zərbələri ilə zərərçəkmişin sifət nahiyəsinə zərbələr vurub.
Hadisədən sonra Gülay evdən çıxıb, Qobu Polis Bölməsinə gedərək Qabil barədə şikayət edib.
Polis əməkdaşları tərəfindən saxlanılan Qabil Eyvazov barəsində Cinayət Məcəlləsinin 128-ci (Qəsdən sağlamlığa yüngül zərər vurma) maddəsi ilə ittiham irəli sürülüb.
