Hicri-qəməri təqvimi ilə məhərrəm ayı başlayıb. Bu barədə 19 iyul tarixində Report məlumat yayıb.
Miladi təqvimlə iyulun 19-u məhərrəm ayının ilk günüdür. Aşura günü iyulun 28-nə təsadüf edir.
Məhərrəm ayı avqustun 17-də başa çatacaq. Növbəti gün, avqustun 18-i səfər ayı başlayır və sentyabrın 16-da bitir.
Aşura günündə hər il olduğu kimi, bu il də qanvermə aksiyaları keçiriləcək. Qanvermə aksiyalarının keçiriləcəyi ünvanlar belədir:
Bakı şəhəri üzrə:
Xəzər rayonu, Mirmövsüm Ağa Ziyarətgahı
Nəsimi rayonu, Göy məscidin (Əjdərbəy) mərasim zalı
Nizami rayonu, Sahibəzzaman məscidi
Səbail rayonu, Bibiheybət məscid ziyarətgahı
Suraxanı rayonu, Qaraçuxur məscidi
Yasamal rayonu, Təzə Pir məscidi
Yasamal rayonu, Hacı Soltanəli məscidi
Binəqədi rayonu, İmam Əli məscidi.
Həmçinin Mərkəzi Qan Bankının Gəncə, Lənkəran, Sumqayıt, Mingəçevir, Şəki, Şirvan, Bərdə və Quba bölmələrində də qanvermə aksiyaları təşkil olunacaq.
“Məhərrəm ayında əzadarlıq mərasimləri İslam Peyğəmbəri Məhəmmədin (s) nəvəsi imam Hüseyn (ə), onun ailə üzvləri və tərəfdarlarının şəhid olması ilə əlaqədar keçirilir. Onlar hicri-qəməri təqvimi ilə 61-ci ildə Kərbəlada şəhid ediliblər”, - məlumatda bildirilib.
Hicri təqviminin ilk iki ayında (məhərrəm və səfər ayları) Azərbaycanın əksər bölgələrində toy mərasimləri keçirilmir.
