Novruz bayramı münasibəti ilə martın 19-20-də “Bakı Metropoliteni” QSC-nin stansiyalarında bayram tədbirləri keçiriləcək. Bu barədə 17 mart tarixində qurumun saytında məlumat verilib.
Məlumata əsasən, “İçərişəhər” (10:30-12:30), “Sahil” (11:30-13:00), “28 May” (12:30-14:00), “Elmlər Akademiyası”(13:30-15:00) stansiyalarında konsert proqramları təşkil ediləcək.
Bildirilib ki, stansiyaların vestibüllərində Azərbaycan və dünya musiqi sənətinin inciləri, bayram ovqatına uyğun musiqi parçaları səsləndiriləcək.
Bundan əlavə, azyaşlı sərnişinlər üçün kitabların müəllifi kimi də tanınan Bəhram Bağırzadə “İçərişəhər” stansiyasında qələmə aldığı yeni nəşrlərini öz imzası ilə təqdim edəcək. Həmçinin uşaqlara Novruz hədiyyələri də təqdim olunacaq.
