“Bakı Metropoliteni” QSC Dünya Azərbaycanlılarının Həmrəyliyi Günü və Yeni il münasibətilə sərnişinlərinə bayram proqramları təşkil edəcək. Bu barədə İnsanoid Report-a istinadən bu gün, 27 dekabr tarixində xəbər verir.
Yeni ilin əsas tədbirlərinin məkanı “İçərişəhər” stansiyası olacaq.
Dekabrın 28-də burada qış nağıllarının rəmzlərinə uyğun bəzədilmiş retro vaqonlardan ibarət qatarın nümayişinə başlanacaq. Həmin gün qatarların ətrafında sərgi də olacaq.
Dekabrın 29-30-da saat 11:30-dan isə elə stansiyada Şaxta baba, Qar qız və müxtəlif nağıl personajları və sirk ustaları da məharətlərini göstərəcəklər.
Yeni il proqramı iki saatdan artıq davam edəcək.
Tədbirin gedişində metropolitenin daha bir ənənəsinə uyğun olaraq, şən və hazırcavab Bəhram Bağırzadə uşaqlar üçün qələmə aldığı kitablarının imza gününü keçirəcək.
Dekabrın 30-31-də milli həmrəyliyimizi və Yeni ili səciyyələndirən musiqi parçalarının da yer alacağı konsert proqramları 4 stansiyada təşkil olunacaq. “İçərişəhər” stansiyasında saat 10:30-da başlanacaq iki hissədən ibarət proqram daha sonra “Sahil”, “28 May”, “Elmlər Akademiyası” stansiyalarında davam etdiriləcək. Konsert proqramlarının hər biri 45 dəqiqə davam edəcək və növbə ilə 15:00-a qədər estafet növbəti stansiyalara veriləcək.
