Ləğv edilmiş Milli Təhlükəsizlik Nazirliyinin (MTN) bir qrup şəxslərinin cinayət işi üzrə zərərçəkmiş şəxs Ali Məhkəməyə müraciət edib. Bu barədə İnsanoid Report-a istinadən bu gün, 22 noyabr tarixində xəbər verir.
“Bakı Tikinti” MMC və “Alfa” MMC şirkətlərinin rəhbəri Kamal Seyfullayevin Kassasiya şikayətinə Ali Məhkəmədə hakim İlqar Qılıcovun sədrliyi ilə keçirilən prosesdə baxılacaq.
2015-ci ilin oktyabrında - keçmiş milli təhlükəsizlik naziri Eldar Mahmudov vəzifədən kənarlaşdırıldıqdan sonra dövlət qurumunun çoxsaylı əməkdaşları həbs ediliblər. Daha sonra - 2015-ci ilin dekabrında Milli Təhlükəsizlik Nazirliyi ləğv edilib.
Ləğv olunmuş Milli Təhlükəsizlik Nazirliyinin (MTN) sabiq baş idarə və idarə rəisləri - general-mayor Sübahir Qurbanov, general-mayor Teymur Quliyev, general-mayor Natavan Mirvətova, eləcə də həmin qurumun digər vəzifəli şəxsləri Fizuli Əliyev, Zaur Məmmədov, Natiq Alıyev, Fərhad Atayev, Anar Şirəliyev, Eşqin Əliyev, Elşad Əzizovun cinayət işində sahibkarlıq fəaliyyəti ilə məşğul olan “Bakı Tikinti” MMC və “Alfa” MMC rəhbəri Kamal Məmmədağa oğlu Seyfullayev zərərçəkmiş şəxs qismində tanınıb.
Məhkəmə iclaslarında dindirilən iş adamı K.Seyfullayev təzyiqlərdən bezdiyi üçün adıçəkilən şəxslərə 2 milyon manat pul verdiyini bildirib.
