Salyanda “Narınc” Psixologiya Mərkəzinin fəaliyyəti dayandırılıb. Bu barədə Fövqəladə Hallar Nazirliyi məlumat verib.
Salyan şəhərinin Ənnağı Hüseynov küçəsi, 32A ünvanında yerləşən “Narınc” Psixologiya Mərkəzində keçirilmiş yoxlama zamanı yanğın təhlükəsizliyi sahəsində çoxsaylı nöqsanların mövcud olduğu, həmin nöqsanların insan həyatı və ya sağlamlığına, ətraf mühitə və dövlətin əmlak maraqlarına birbaşa təhlükə yaratdığı müəyyən edilib.
Mərkəzdə bir sıra nöqsanlar aşkarlanıb. Belə ki, obyektin istismarı Dövlət Yanğın Nəzarəti Xidməti ilə razılaşdırılmayıb. Obyekt “İcbari sığortalar haqqında” Azərbaycan Respublikasının Qanununa uyğun olaraq sığorta olunmayıb. Obyektdə avtomatik yanğınxəbərverici siqnalizasiya qurğuları yoxdur. Obyekt ilkin yanğınsöndürmə vasitələri ilə təmin olunmayıb. Elektrik təchizatı və elektrik qurğuları “Elektrik Qurğularının Quraşdırılması Qaydaları”nın tələblərinə uyğun quraşdırılmayıb. Obyektdə təxliyə planı mövcud deyil. Mətbəx otağının, sanitar qovşağının tavan sahələri yanar üzlük materialla üzlənib və pilləkən qəfəsi taxta konstruksiyadan inşa edilib. Habelə məlum olub ki, obyektdə daxili qaz boruları yivli birləşmələrlə istismar olunur.
Beləliklə, obyektin istismarının davam etdirilməsi nəticəsində orada hər an baş verə biləcək yanğın qısa müddətdə genişlənərək faciəni qaçılmaz edəcək.
Nəticədə Salyandakı “Narınc” Psixologiya Mərkəzinin fəaliyyəti dayandırılıb.
[gallery link="file" size="full" ids="111588,111586,111587"]
