Neftçala Heydər Əliyev Mərkəzində neftçalalı şəhid zabit Ayaz İmanzadəyə həsr olunmuş “Ayazda sevdim izini” filmi nümayiş etdirilib, “Onu belə xatırlayıram” kitabının təqdimatı olub. Bu barədə Report 4 dekabr tarixində xəbər verib.
Tədbirdə Rayon İcra Hakimiyyətinin başçısı Mirhəsən Seyidov, hüquq-mühafizə orqanlarının rəsmiləri, şəhid ailələri, qazilər, müharibə iştirakçıları, şəhidin tələbə və səngər yoldaşları və ictimaiyyətin nümayəndələri iştirak ediblər.
Qarabağ torpağı uğrunda şəhid olmuş oğullarımızın əziz xatirəsi bir dəqiqəlik sükutla yad edilib, sonra Dövlət Himni səsləndirilib.
Filmdən öncə Rayon İcra Hakimiyyətinin başçısı Mirhəsən Seyidov, şəhidin atası Daşqın İmanzadə, Vətən Müharibəsinin Qəhrəmanı Camal İsmayılovun anası Flarə İsmayılova, “Vətən naminə” Şəhid Ailələrinə Dəstək İctimai Birliyinin rəhbəri Tünzalə Abduləlimova, jurnalistlər, Qadın və Uşaqların Təhsilinə Dəstək İctimai Birliyinin rəhbəri, “Qadın gülərsə” verilişinin aparıcısı Sevinc Fədai, “Gündoğar” qəzetinin baş redaktoru, yazıçı-publisist Bədirə Rza Həsənqızı və başqaları çıxış ediblər.
Tədbirdə, həmçinin Azərbaycanın Milli Qəhrəmanı Samid İmanov adına 1 saylı Neftçala şəhər tam orta məktəbin Ayaz İmanzadə adına sinif şagirdləri ədəbi-bədii kompozisiya göstəriblər.
Sonra şəhid Ayaz İmanzadənin 44 günlük Vətən müharibəsində göstərdiyi igidliyindən bəhs edən, onunla bağlı xatirələrin yer aldığı, Orxan Əzimin rejissoru olduğu “Ayazda sevdim izini” filmi numayiş olunub.
Leytenat A.İmanzadə Füzulinin azad edilməsi zamanı - oktyabrın 2-də şəhidlik zirvəsinə ucalıb.
Ölümündən sonra “Vətən uğrunda”, “Xocavəndin azad olunmasına görə”, “Füzulinin azad olunmasına görə” və “Şuşanın azad olunmasına görə” medalları ilə təltif edilib.
Bununla yanaşı, yazıçı-publisist Nəzakət Quluqızının şəhid Ayaz İmanzadəyə həsr etdiyi “Onu belə xatırlayıram” kitabının təqdimatı keçirilib.
Həm film, həm də kitab tədbirə toplaşanlar tərəfindən böyük maraqla qarşılanıb.
Şəhid analarına Rayon İcra Hakimiyyətinin təşəkkürnamələri və “Vətən naminə” Şəhid Ailələrinə Dəstək İctimai Birliyinin medalları təqdim olunub.
