"Nikosayağı” kimi ilə tanınan bloger Nicat Şakirlinin cinayət işi üzrə ilk baxış iclası keçirilib. Bu barədə APA 6 fevral tarixində xəbər verir.
Bakı Ağır Cinayətlər Məhkəməsində hakim Samir Əliyevin sədrliyi ilə keçirilən iclasda ittiham aktı elan olunub.
Təqsirləndirilən Nicat Şakirli özünü təqsirli bilir.
O, hadisəni xatırlamadığını bildirib:
"Nərimanovda oturmuşduq. Okey oynayırdıq. Sonra sıxıldıq. Dedim, dur gedək gəzək. Mərhumla ikimiz çıxdıq. Maşınla gəzirdik. Mən evə gedib paltarımı dəyişmək istəyirdim. Sonradan yenidən mərhumun yanına qayıdası oldum. Mərhumun pulqabısı maşınında qalmışdı. Maşını da Xətaidə idi. Hadisədən 1-2 saat qabağı xatırlayıram. Sonra nə olduğunu videoya baxıb bildim. Heç nəyi xatırlamıram. Hadisə zamanı içkili olmamışam. Mərhum da içməyə qoymazdı. Mənə qaranlıq olan şey odur ki, hadisə zamanı içkili olmamışam, məndən nümunə necə götürülüb".
Növbəti məhkəmə prosesi fevralın 27-nə təyin edilib.
Ona qarşı Cinayət Məcəlləsinin 263-1.3 (Yol hərəkəti və ya nəqliyyat vasitələrinin istismarı qaydalarını sərxoş halda və ya nəqliyyat vasitələrini idarə etmək hüququ olmayan şəxs tərəfindən pozma, eyni əməllər ehtiyatsızlıqdan zərərçəkmiş şəxsin ölümünə səbəb olduqda) maddəsi ilə ittiham irəli sürülüb.
Nicat Şakirlinin təqsiri sübuta yetirilərsə, 5 ilə kimi nəqliyyat vasitələrini idarə etmək hüququndan məhrum edilməklə 5 ildən 8 ilə qədər azadlıqdan məhrum edilə bilər.
Hadisə ötən ilin avqustunda qeydə alınıb. N.Şakirli idarə etdiyi “Porsche” markalı avtomobili ilə TIR-a çarpılıb. Qəza nəticəsində avtomobildə olan blogerin dostu Ruslan Məmmədov həlak olub. Nicat Şakirlinin sağ yuxarı ətrafı dirsəkdən amputasiya edilib.
