Oğuz rayonunun Yemişənli kəndinin yolu yararsız vəziyyətdədir. Bu barədə noyabrın 2-də Report-a kənd sakinləri məlumat veriblər.
Onların sözlərinə görə, 700 nəfər sakini olan kəndin yolunun uzunluğu cəmi 2 kilometr olsa da, heç vaxt təmir olunmayıb.
Qaraməryəm-İsmayıllı-Şəki avtomobil yolunun sağ qolu olan bu yolda çoxlu çalalar əmələ gəlib və yağış yağdıqdan sonra onlar su ilə dolur. Nəticədə nəqliyyat vasitələrinin hərəkəti çətinləşir.
Məsələ ilə bağlı Avtomobil Yolları Dövlət Agentliyindən bildirilib ki, həmin yolun vəziyyəti ilə bağlı məlumatlıdırlar: "Bu yol təmirə ehtiyacı olan yolların siyahısına daxil edilib. Maliyyə vəsaiti ayrılan kimi agentlik təmir işlərini həyata keçirəcək".
