Bakıda keçiriləcək atıcılıq üzrə dünya çempionatına rəsmi geri sayıma mayın 5-də start verilib. Bu barədə 5 may tarixində Report məlumat verib.
Bununla bağlı təşkil olunan tədbirdə dünya çempionatlarında Azərbaycanın qazandığı medallara görə 71 ölkə arasında 39-cu pillədə qərarlaşdığı və yığma komandamızın aktivində 5 medal olduğu diqqətə çatdırılıb.
Qeyd olunub ki, 2000-ci ildə Sidneydə keçirilmiş Yay Olimpiadasının qalibi, müstəqil Azərbaycanın ilk Olimpiya çempionu və dünya çempionatının qalibi olan ilk azərbaycanlı qadın kimi tarixə düşmüş Zemfira Meftahətdinova, Azərbaycanı 4 dəfə Olimpiya Oyunlarında təmsil etmiş İradə Aşumova kimi əfsanələrin ardınca yeni nəsil yetişir.
Tədbirdə gənclər və idman naziri Fərid Qayıbov, nazir müavini Mariana Vasileva, Azərbaycan Atıcılıq Federasiyasının baş katibi Emin Cəfərov və digərləri iştirak ediblər.
Rəsmi hissə başa çatdıqdan sonra ölkənin tanınmış müğənnilərinin iştirakı ilə konsert proqramı, uşaq və böyüklərin atıcılıq məharətlərini nümayiş etdirmək üçün stendlər və əyləncə guşələri təşkil olunub.
Qeyd edək ki, çempionat avqustun 14-dən 20-dək Bakıda keçiriləcək. Mötəbər yarışda Paris-2024 Yay Olimpiya Oyunlarına 48 lisenziya oynanılacaq.
