Bakı şəhəri üzrə keçirilən eksternat qaydasında aralıq imtahanlarının nəticələri açıqlanıb. Bu haqda 17 yanvar tarixində Report xəbər verib.
Əvvəlki illərdə ümumi orta (IX) və tam orta (XI) təhsil səviyyələrini başa vura bilməyən 879 şəxsdən 181 nəfər eksternat imtahanlardan uğurla keçib. Onlardan 47 nəfər ümumi orta təhsil səviyyəsi üzrə, 134 nəfər isə tam orta təhsil səviyyəsi üzrə keçirilən imtahanlarda uğur qazanıb.
Növbəti mərhələdə Dövlət İmtahan Mərkəzi tərəfindən keçiriləcək buraxılış imtahanlarında iştirak edən eksternlər müvafiq olaraq, ümumi orta və tam orta təhsil haqqında attestat ala biləcəklər.
Qeyd edək ki, eksternat təhsilalma formasının tətbiqi müxtəlif səbəblərdən ümumi orta və tam orta təhsil səviyyələrini başa vura bilməyən şəxslərə həmin səviyyələr üzrə buraxılış imtahanı verib müvafiq təhsil sənədi almaq üçün şərait yaratmaq məqsədi daşıyır.
