Fransanın paytaxtı Parisdə, UNESCO-nun mənzil-qərargahının konsert zalında Azərbaycanın dünya şöhrətli bəstəkarı Fikrət Əmirovun 100 illiyi qeyd edilib. Bu barədə noyabrın 4-də Report xəbər verib.
Musiqi axşamında Azərbaycanın Xalq artisti, dirijor Fəxrəddin Kərimovun rəhbərliyi altında Üzeyir Hacıbəyli adına Azərbaycan Dövlət Simfonik Orkestri, respublikamızın Xalq artisti Fərhad Bədəlbəyli, Əməkdar artistlər - Səbinə Əsədova, Babək Niftəliyev, gənc müğənnilər Selcan Nəsibli, Orxan Cəlilov çıxış ediblər.
Proqrama bəstəkarın “Azərbaycan kapriççiosu”, “Gülüstan Bayatı-Şiraz”, “Azərbaycan süitası”, F.Əmirov və Elmira Nəzirovanın həmmüəllif olduqları “Ərəb mövzuları əsasında fortepiano konserti”, habelə bəstəkarın “Şeyx Sənan” tamaşası üçün yazdığı məşhur “Kor ərəbin mahnısı”, “Azərbaycan elləri” vokal inciləri və digər əsərlər daxil edilib.
