Azərbaycanda ümumi daxili məhsul 6,8% artıb. Bunu Prezident İlham Əliyev 12 aprel tarixində 2022-ci ilin birinci rübünün yekunlarına həsr olunan müşavirədə bildirib.
“Qeyri-neft iqtisadiyyatımız 10%-dən çox artıb. Sənaye istehsalı sahəsində artım 4%, qeyri-neft sənaye istehsalında isə 18%-dən çoxdur”, - deyə dövlət başçısı qeyd edib.
İlham Əliyev ölkənin ticarət dövriyyəsindən də danışıb: “Xarici ticarət dövriyyəmiz 60%-dən çox, ixracımız təxminən iki dəfə, qeyri-neft ixracımız isə 45% artıb”.
Prezident qeyd edib ki, əksər ölkələrdə saldo mənfi olsa da, Azərbaycanın xarici ticarət balansı müsbətdir: “Ölkələr daha çox idxal edir, nəinki ixrac edir. Azərbaycanda isə təkcə üç ayda 5,1 milyard dollar gəlir - bizim ixracımız idxalı üstələyir”.
“Keçən ilin aprelində xarici dövlət borcumuz ümumi daxili məhsulun 18%-ni təşkil edirdi, hazırda cəmi 12,5%-ni təşkil edir. Yəni, biz bir il ərzində xarici borcu təqribən 600 milyon dollardan çox bir səviyyədə aşağı sala bilmişik”, - Azərbaycanın xarici dövlət borcundan danışarkən ölkə rəhbəri söyləyib.
