Qəbələ rayonunda dağlıq ərazidə köməksiz vəziyyətdə qalan şəxs xilas olunub. Bu barədə 23 may tarixində Fövqəladə Hallar Nazirliyi məlumat verib.
Bildirilib ki, nazirliyin “112” qaynar telefon xəttinə Qəbələ rayonunun Laza kəndi ərazisində 1 nəfərin dağlıq ərazidə yıxılaraq təhlükəli vəziyyətdə qalması barədə məlumat daxil olub.
Hadisə yerində əməliyyat şəraiti qiymətləndirilərkən müəyyən olunub ki, Qəbələ rayon sakini, 1985-ci il təvəllüdlü Nazim İsakov mürəkkəb relyefli dağlıq ərazidə yüksəklikdən yıxılıb, müxtəlif dərəcəli bədən xəsarətləri alaraq, təhlükəli vəziyyətə düşüb.
Əvvəlcə xəsarət almış şəxsə xilasedicilər tərəfindən ilkin yardım göstərilib, o cümlədən sınmış qoluna şina qoyulub.
Daha sonra N.İsakov təcili tibbi yardım briqadasına təhvil verilib.
