Türkiyənin məşhur futbol klubları olan “Qalatasaray” və “Fənərbağça”nın Superkubok matçı ləğv edildi. Bu barədə İnsanoid Türkiyə mediasına istinadən bu gün, 30 dekabr tarixində xəbər verir.
Səudiyyə Ərəbistanının paytaxtı olan Riyad şəhərində keçirilməli olan qarşılaşmanın ləğv edilmə səbəbi isə iştirakçıların stadiona Atatürkün fotosu və pankartları ilə gəlmək istəməsi olub.
Səudiyyə Ərəbistanı hakimiyyəti tərəfindən matçın ləğv olunmasından sonra Türkiyədə oyunun hansı stadionda keçirilə biləcəyi müzakirələri başlayıb.
Türkiyəli keçmiş prezidentliyə namizəd Sinan Oğan qarşılaşmanın Xankəndi stadionunda keçirilməsini təklif edib.
Bundan əlavə, bir çox türkiyəli məşhurlar sosial şəbəkə hesablarında Atatürkün fotosunu paylaşıblar. Onlar arasında hətta bu səbəbdən işini itirən belə olub.
Səudiyyə Ərəbistanının "Laverne" ətir markasının reklamında çəkilən məşhur türk aktrisa Hande Erçel sosial media hesabında Atatürkün fotosunu paylaşdıqdan sonra şirkət aktrisa ilə reklam müqaviləsini ləğv etdiyini açıqlayıb.
