Birləşmiş Krallıqda ənənəvi olaraq təşkil edilən “Vindzor Kral Atçılıq Şousu” start götürüb. Bu barədə İnsanoid Azərbaycanın Dövlət Sərhəd Xidmətinin (DSX) Mətbuat Mərkəzinə istinadən bu gün, 12 may tarixində xəbər verir.
Vindzor qəsrinin ərazisində keçirilən tədbirdə Azərbaycandan Britaniyaya böyük yol qət etmiş 60 nəfərdən ibarət nümayəndə heyətimizin ilk çıxışı baş tutub.
“Dumanlı Albion”un yağmurlu havasına baxmayaraq, 20 Qarabağ atı ilə DSX-nin rəqs ansamblı və süvarilər dəstəsi ölkəmizi növbəti dəfə yüksək səviyyədə təmsil edərək tamaşaçıların böyük rəğbətini qazanıb.
Nümayəndə heyətimizin təqdim etdiyi “Odlar Yurdu” adlı şou-kompozisiyanın əsasını Vindzor tamaşaçılarına çox yaxşı tanış olan, burada özünə heyranlar ordusu qazanıb, çılğınlığı və gözəlliyi ilə seçilən Qarabağ atları, eləcə də zərif Azərbaycan rəqsləri və ecazkar milli musiqimiz təşkil edib.
Heydər Əliyev Fondunun dəstəyi, Azərbaycan Atçılıq Federasiyasının təşkilatçılığı ilə hazırlanmış şou-kompozisiyanın quruluşçu rejissoru Əməkdar jurnalist Rövşən Cahangirov, xoreoqrafı DSX-nin rəqs amsamblının bədii rəhbəri, Əməkdar artist Fərid İbrahimov və suvarilər dəstəsinin quruluşçu təlimatçısı İmran Əhmədlidir.
Şou-proqram tədbir iştirakçıları tərəfindən coşqu ilə qarşılanıb və böyük tamaşaçı kütləsinin zövqünü oxşayıb. İzləyicilər təmsilçilərimizi ayaq üstə alqışlayıblar.
Nümayəndə heyətimizin çıxışları may ayının 14-dək davam edəcək.
[caption id="attachment_115746" align="alignnone" width="696"]
Foto DSX-nin rəsmi saytı[/caption]
