Yanvarın 28-i saat 11:00-da işğaldan azad olunmuş ərazilərə təşkil edilən müntəzəm avtobus reyslərinə fevral ayı üçün biletlər satışa çıxarılacaq. Bu barədə 25 yanvar tarixində Azərbaycan Yerüstü Nəqliyyat Agentliyi məlumat yayıb.
Vətəndaşlar bilet almaq üçün şəxsiyyətini təsdiq edən sənəddəki məlumatları sistemə daxil etməlidirlər. Bilet yalnız şəxsiyyət vəsiqəsi ilə eyniləşdirilən vətəndaş tərəfindən istifadə oluna bilər. Onun başqa şəxsə ötürülməsi mümkün deyil. Sərnişinlər müəyyən olunmuş marşrut xətləri üzrə gediş və qayıdış biletlərini əvvəlcədən eyni vaxtda www.yolumuzqarabaga.az portalı vasitəsilə onlayn qaydada ala bilərlər.
Şuşa və Ağdam şəhərlərinə ilk müntəzəm avtobus marşrutları 2022-ci il yanvarın 24-də istifadəyə verilib. Bu günə qədər ümumilikdə 680 reys həyata keçirilib, 27 822 sərnişin işğaldan azad olunmuş əraziləri ziyarət edib.
