Güclü yağış nəticəsində yaranan sel sularının gətirdiyi lil və qaya parçalarının bağladığı Quba-Xınalıq yolunda hərəkət tam bərpa olunub. Bu barədə İnsanoid Azərbaycan Avtomobil Yolları Agentliyinə istinadən bu gün, 16 iyun tarixində xəbər verir.
Ötən gün axşam saatlarında sel suları avtomobil yolunun bəzi hissələrini yararsız hala salıb. Hazırda yol infrastrukturuna və yol qurğularına dəyən ziyanın aradan qaldırılması istiqamətində işlər davam etdirilir.
Azərbaycan Avtomobil Yolları Dövlət Agentliyindən yolda yaranmış vəziyyət barədə bildirilib ki, güclü yağış nəticəsində yaranmış sel suları Quba-Xınalıq avtomobil yolunun bəzi hissələrini yararsız hala salıb, yol infrastrukturuna və yol qurğularına ciddi ziyan vurub.
Bundan başqa, sel suları özü ilə bərabər lil və qaya parçaları gətirərək avtonəqliyyat vasitələrinin hərəkətində çətinliklər yaradıb.
Quba-Xınalıq avtomobil yolu boyunca hərəkətin təhlükəsizliyi və fasiləsizliyində yaranan problemlərin aradan qaldırılması üçün Azərbaycan Avtomobil Yolları Dövlət Agentliyinin “5 N-li Yol İstismarı” MMC tərəfindən təbii fəlakət baş verdiyi andan etibarən tədbirlər görülüb, əraziyə xüsusi texnikalar və canlı qüvvə səfərbər olunub.
Yol boyunca təhlükəsiz və fasiləsiz hərəkət bərpa olunub.
