Sel sularının uçurduğu Gəndob-Xaçmaz-Yalama-Rusiya ilə dövlət sərhədi avtomobil yolunun 27-ci km-də, Qudyalçay üzərində dağılmış avtomobil körpüsünün yerində inşa olunan yeni körpünün aşırım tirləri montaj olunub.
Bu barədə İnsanoid Azərbaycan Avtomobil Yolları Dövlət Agentliyinə istinadən bu gün, 13 noyabr tarixində xəbər verir.
İkiaşırımlı yeni körpünün uzunluğu 66, eni isə 14.5 metr olacaq. Körpüdə piyadalar üçün 2 hərəkət zolağı da nəzərdə tutulub.
Artıq sözügedən körpünün dayaqlarının, orta dayaq bünövrəsinin və sütünlarının inşası yekunlaşıb. Dayaqlar üzərində aşırım tirlərinin montaj işləri də tamamlanıb. Hazırda tirlərin üzərinin betonlanması üçün hazırlıq işləri aparılır. Bundan başqa, çay məcrasında mühafizə bəndinin və istinad divarlarının inşası da davam etdirilir.
Yeni körpünün tikintisi fasilə verilmədən davam etdirilir.
Yeni körpü inşa edilənədək vətəndaşların rahat hərəkətini təmin etmək üçün ərazidə yeni alternativ yol çəkilərək istifadəyə verilib. 200 metr uzunluğa malik sözügedən müvəqqəti yol körpüdən təxminən 50 metr qərb istiqamətdə inşa olunub.
Bundan başqa, sürücülər müvəqqəti alternativ yol kimi Xaçmaz rayonunun Qımılqışlaq kəndi ərazisindən keçən yoldan da istifadə edə bilərlər.
