"İlkin mərhələdə bizim məqsədimiz taksilərin deyil, taksi gedişlərinin sayını azaltmaqdır". Bunu Milli Məclisin İqtisadi siyasət, sənaye və sahibkarlıq komitəsinin iclasında rəqəmsal inkişaf və nəqliyyat naziri Rəşad Nəbiyev deyib.
Bu barədə 12 iyun tarixində Report məlumat verib.
"Bu gün taksi gedişlərinin 60%-i 1,5-3 km ətrafındadır. Bu da o məsafədir ki, ya ayaqla getmək olar, ya da ictimai nəqliyyatdan istifadə etməklə", - deyə nazir əlavə edib.
Bundan başqa, R.Nəbiyev deyib ki, heç bir ölkədə Azərbaycandakı qədər ucuz taksi xidməti yoxdur: "Bu, belə olmalıdırmı? Yox. Bu ilin sonuna qədər qarşıya qoyduğumuz qısa uduşlar var. Burada zolaqların çəkilməsi və onların istismarının təmin edilməsi nəzərdə tutulub. Polis əməkdaşlarımız ictimai nəqliyyatın getdiyi xətlərlə pik saatlarda adi avtomobillərin də getməsini təmin edir. Amma qanunvericiliyə dəyişiklik və sonradan bizim qəbul edəcəyimiz məsələlər imkan verəcək ki, həmin xətlərin haradan çəkilməli olduğunu müəyyən edək".
