Xalq artisti Rasim Ocaqovun anadan olmasının 90 illiyi ilə əlaqədar onun xatirəsi anılıb. Bu barədə İnsanoid Mədəniyyət Nazirliyinə istinadən bu gün, 22 noyabr tarixində xəbər verir.
Bu münasibətlə tanınmış incəsənət və mədəniyyət xadimləri, ictimaiyyət nümayəndələri ikinci Fəxri xiyabana gələrək Azərbaycan kino sənətinin görkəmli nümayəndəsi, rejissor, operator, Dövlət mükafatı laureatının məzarını ziyarət edib, önünə əklil və tər çiçəklər düzüblər.
Anım mərasimində mədəniyyət nazirinin müavini Murad Hüseynov Azərbaycan kino sənətinə dəyərli töhfələr vermiş Rasim Ocaqovun mənalı ömür yolu və zəngin yaradıcılığı barədə danışıb. O qeyd edib ki, Rasim Ocaqovun sənəti, yaradıcılığı kino sənətimizin, xalqımızın dəyərli incisidir. Kinomuzu təkcə respublikamızda yox, eyni zamanda beynəlxalq müstəvidə də tanıdıb. Çəkdiyi filmlər görkəmli sənətkarı yaşadıb və yaşadacaq.
Zamanın və kinonun dəyişdiyini söyləyən Xalq artisti Fəxrəddin Manafov deyib: “Təəssüflər olsun ki, heç nə əbədi deyil. Peşəyə gəlmək, aktyor olmaq, filmlərə çəkilmək olar. Amma lazımi olan zaman lazımi olan yerdə olmaq şansdır. Mən aktyor olacaqdım, lakin Rasim müəllim mənim həyatımı dəyişdi. Altı filmdə rol almışam. Mən o filmlərdə nəsə edə bilmişəmsə, bu, mənim üçün böyük şərəfdir".
Anım mərasimində çıxış edən natiqlər Rasim Ocaqovla bağlı xatirələrini bölüşüb və onun Azərbaycan kino tarixinə bəxş etdiyi bənzərsiz ekran əsərlərindən danışıblar.
