Mülki məsuliyyətin icbari sığortasından kimlər və hansı hallarda istifadə edə bilər? Bu məsələ ilə bağlı Report "Azərbaycan Sığortaçılar Assosiasiyası" İctimai Birliyinin eksperti Emil Ağabağırovla həmsöhbət olub.
Ekspertin sözlərinə görə, daşınmaz əmlakın istismarı ilə bağlı mülki məsuliyyətin icbari sığortası yalnız qeyri-yaşayış obyektlərinə şamil olunur: “Yanğın, partlayış, su basma və digər hadisələrə görə 100 min manatlıq təminat verir”. Emil Ağabağırov bildirib ki, həmin məbləğin 50 min manatı sağlamlığa, 50 min manatı isə əmlaka dəyən zərərə görə ödənilir. Lakin o qeyd edib ki, bir şəxsə sağlamlığa dəyən zərərə görə ödəniş maksimum 5 min manat olmalıdır. Misal olaraq, 5 nəfər zərər çəkibsə, onlara ümumilikdə 50 min manat deyil, 25 min manat ödənilir.
İctimai Birliyin nümayəndəsi bildirir ki, icbari sığortanın haqqı obyektin fəaliyyət növündən asılıdır: “Məsələn, yanacaqdoldurma məntəqəsində risk böyük olduğuna görə onun sığorta haqqı da yüksəkdir”.
“İcbari sığortalar haqqında” qanuna görə, daşınmaz əmlakın istismarı ilə bağlı mülki məsuliyyətin icbari sığortasından yalnız hüquqi şəxslər istifadə edə bilər. “Əgər obyekt sahibi olan şirkətlər bu sığorta növünü əldə etməsələr, İnzibati Xətalar Məcəlləsi əsasında məsuliyyət daşıyır və cərimə ödəyirlər”, - ekspert İlkin İbrahimov bildirlib.
Azərbaycan Mərkəzi Bankının açıqladığı statistik hesabata əsasən, 2022-ci ilin yanvar-fevral aylarında ötən ilin eyni dövrü ilə müqayisədə Azərbaycanda daşınmaz əmlakın istismarı ilə bağlı mülki məsuliyyətin icbari sığortası üzrə 53 dəfə çox sığorta ödənişi həyata keçirilib.
