İmişli İcra Hakimiyyətinin inzibati binasının tikintisi üçün müqavilə üzrə 6 milyon 200 min manat vəsait göstərilib, lakin 4 milyona yaxın pul köçürülüb. Həmin məbləğin isə 30%-i şəhərin başçısına çatıb. APA-nın xəbərinə görə, bunu aprelin 15-də Vilyam Hacıyevin məhkəməsində dindirilən “NTS Company”nin direktoru Elnur İsayev deyib.
Şahid bildirib ki, təxminən 990 min manatı qurumun əməkdaşına verib, o da həmin pulu Vilyam Hacıyevə çatdırdı. Təqsirləndirilən şəxs prosesdə hər sözün tamamilə yalan olduğunu və şahidi, ümumiyyətlə, tanımadığını söyləyib. İfadə verən digər sahibkar Nakim Xəlilov isə 11 min manat rüşvət verdiyini qeyd edib.
Proses aprelin 18-də davam etdiriləcək.
Adiçəkilən şəxs 2004-2006-cı illərdə Göygöl, 2006-2012-ci illərdə Samux, 2012-ci ildən isə İmişlinin başçısı kimi işləyib. O, 2020-ci il mayın 5-də DTX tərəfindən saxlanılıb.
Vilyam Hacıyev vəzifə cinayətləri ilə yanaşı, qanunsuz silah saxlamaqda da təqsirli bilinib.
