Bu gün Azərbaycanda hər hansı dərman çatışmazlığı faktı yoxdur. Report-un xəbərinə görə, bunu noyabrın 3-də səhiyyə naziri Teymur Musayev deyib.
O bildirib ki, Azərbaycan bazarında uşaqlara verilən hərarətsalıcı dərman vasitələrinin, xüsusilə də siropların azalmasının ölkəmizlə heç bir əlaqəsi yoxdur.
“Dünyada həmin dərmanları istehsal edən şirkətlər baza maddədən istifadə edirlər. Həmin baza maddəni istehsal edən iri farmakoloji şirkətlərin istehsalat xətlərində problem yaranıb. Bu böhran prinsipcə tək Azərbaycanda deyil, hətta bəzi Avropa ölkələrində də müşahidə olunurdu”, - deyə nazir bildirib.
Artıq mövcud problem tamamilə aradan qaldırılıb və həmin dərmanlar Azərbaycana gətirilib. Qısa müddətdə onlar pərakəndə satışa veriləcək.
