Şəkidə baş verən ağır yol qəzasında biri azyaşlı olmaqla iki nəfər ölüb, üç nəfər isə xəsarət alıb. Bu barədə 2 iyul tarixində APA məlumat verib.
Belə ki, 1978-ci il təvəllüdlü Nazim Umarhacı oğlu Umarov idarə etdiyi “Reno Loga” markalı 99-VG-782 dövlət nömrə nişanlı minik avtomobili ilə hərəkətdə olarkən idarəetmənin itirilməsi səbəbindən maşını yolun kənarındakı ağaca vurub.
Qəza zamanı avtomobildə olan sərnişinlər - 1993-cü il təvəllüdlü Azər Əli oğlu Murtuzov və Şəki rayonu Suçma kənd sakini 2019-cu il təvəllüdlü Sədəf Dilqəm qızı Seyidəliyeva aldığı ağır xəsarətlərdən hadisə yerində ölüblər.
Sürücü N. Unarov və daha iki sərnişin - qəza zamanı həyatını itirən azyaşlı Sədəfin atası, 1990-cı il təvəllüdlü Dilqəm Vəli oğlu Seyidəliyev və 2001-ci il təvəllüdlü Beyləqən rayon sakini Əşrəf Zöhrab oğlu Hüseynzadə müxtəlif dərəcəli bədən xəsarətləri alıblar.
Yaralanan şəxslər müayinə və müalicə edilmək üçün Şəki Rayon Mərkəzi Xəstəxanasına (RMX) yerləşdiriliblər.
Faktla bağlı araşdırma aparılır.
