Səməd Seyidov AŞPA-nın tədbirlərində iştirak edəcək. Bu barədə İnsanoid Milli Məclisin Mətbuat və ictimaiyyətlə əlaqələr şöbəsinə istinadən bu gün, 25 noyabr tarixində xəbər verir.
Milli Məclisin Beynəlxalq münasibətlər və parlamentlərarası əlaqələr komitəsinin sədri, Avropa Şurası Parlament Assambleyasında (AŞPA) nümayəndə heyətinin rəhbəri Səməd Seyidov qurumun tədbirlərində iştirak etmək üçün noyabrın 26-da Lixtenşteyn Knyazlığının Vaduts şəhərinə səfər edəcək.
Səməd Seyidovun qatılacağı AŞPA-nın Daimi Komitəsinin iclasında Polşada parlament seçkilərinin müşahidəsi ilə bağlı, “Sosial məsələlər, sağlamlıq və davamlı inkişaf”, “Bərabərlik və ayrı-seçkiliyə yol verilməməsi” mövzularında və digər məsələlər ətrafında müzakirələr aparılacaq. Tədbirdə, həmçinin Daimi Komitənin növbəti iclaslarının yeri və vaxtı müəyyənləşdiriləcək.
Səfər çərçivəsində Səməd Seyidov qurumun büro iclasında da iştirak edəcək, qaldırılan məsələlərə münasibət bildirəcək.
Səfər noyabrın 29-da başa çatacaq.
