Bu gün Şamaxı rayonunun Meysəri kəndində II Üzüm və Şərab Festivalı işə başlayıb. Bu barədə 25 noyabr tarixində Report məlumat verib.
Festivalda ölkəmizin müxtəlif bölgələrindən olan üzüm emalı və şərab istehsalı zavodları müxtəlif çeşidli şərablar nümayiş etdirir. Həmçinin şərabçılıqla bağlı tədbirlər - şərab dequstasiyaları, yarmarkalar, yerli və beynəlxalq ekspertlərin iştirakı ilə somelye kursları təşkil olunur, qonaqlara "Azərbaycanda şərabçılıq və şərab istehsalı tarixi" haqqında məlumat xarakterli təqdimatlar nümayiş etdirilir.
Festival çərçivəsində turizm sənayesi nümayəndələrinin iştirakı ilə "Azərbaycanda şərab turizminin perspektivləri" mövzusunda dəyirmi masa keçiriəcək. Tədbirdə "Ölkə imicinin formalaşması mexanizmində enoturizm" və "Şərabçılığın bir turizm məhsulu kimi inkişafı texnikası" mövzularında müzakirələr aparılacaq.
Uzun illərdən sonra ilk dəfə Qarabağda - Tuğda yetişdirilən Azərbaycanın ən qədim yerli texniki üzüm sortu hesab olunan "Xındoqnı" üzüm sortundan alınan yüksək keyfiyyətli qırmızı süfrə şərablarının təqdimatı da baş tutacaq.
Sərgi, əyləncə, piknik, suvenir, kulinariya kimi zonaları olan festival ərazisində ziyarətçilər yerli və xarici istehsalçıların şərab məhsullarını dequstasiya edə, həmçinin bəyəndikləri məhsulları ala bilirlər.
Tədbir sabah başa çatacaq.
[gallery link="file" columns="2" size="full" ids="139262,139263"]
