Şamaxı rayonunda növbəti toxum sərgi-satış yarmarkası keçirilib. Bu barədə 19 avqust tarixində Kənd Təsərrüfatı Nazirliyi məlumat verib.
Heydər Əliyev parkında keçirilən tədbirdə Şamaxı, Qobustan, İsmayıllı, Ağsu, Göyçay rayonlarından olan fermerlər iştirak ediblər.
Məqsəd yerli toxum bazarının formalaşması, sertifikatlı toxumlara əlçatanlığın təmin edilməsi, toxum istehsalçıları ilə fermerlər arasında birbaşa münasibətlərin qurulmasıdır.
Təşkil edilən yarmarkada 20-dən çox toxumçu fermer iştirak edib.
Azərbaycan Toxumçular Assosiasiyasının sədri Mədinə Əliyeva yüksək məhsuldarlığın əldə edilməsi üçün ilk növbədə rayonlaşmış və setrifikatlaşmış əkin materialının seçilməsinin vacibliyini vurğulayıb. O qeyd edib ki, yarmarkalarda fermerlər fərqli seçimlə iqlim şəraitinə, torpağın xüsusiyyətlərinə tam uyğun toxum əldə etmək imkanı qazanırlar.
Tədbirdə fermerlərə regionun torpaq-iqlim xüsusiyyətlərinə uyğun olaraq, sortların seçilməsi, toxumun təmizlənməsi, dərmanlanması, aqrotexniki qulluq qaydaları barədə ətraflı məlumatlar verilib.
Toxum sərgi-satış yarmarkası ilə yanaşı, festivalda kənd təsərrüfatında ixtisaslaşmış çoxsaylı şirkətlər tərəfindən texnika, aqreqatlar, pilotsuz uçuş aparatları, suvarma texnologiyaları, gübrə, pestisid nümunələri, əkin materialları sərgilənib.
Qeyd olunub ki, növbəti toxum sərgi-satış yarmarkası avqustun 25-də Ağstafa rayonunda təşkil olunacaq.
