Qarabağın yenidən qurulması proqramının icrası üçün dövlət büdcəsindən ayrılmış vəsait 2,2 milyard manatdır. Bunu maliyyə naziri Samir Şərifov 12 aprel tarixində keçirilən 2022-ci ilin birinci rübünün yekunlarına həsr olunan müşavirədə bildirib.
Onun sözlərinə görə, bu ilin birinci rübü ərzində proqramın 346 milyon manat, yaxud 16%-ə yaxın hissəsi artıq icra olunub.
Nazir bildirib ki, ötən ilin ümumi daxili məhsulu üzrə nəzərdə tutulan artım artıqlaması ilə icra edilmişdir, yəni 2,2% artıq, 3,4%-in əvəzinə 5,6%. O qeyd edib ki, birinci rübdə dövlət büdcəsinin gəlirləri 418 milyon manat artıqlaması ilə icra olunmuşdur və dövlət büdcəsinin gəliri 7 milyard 10 milyon manat təşkil etmişdir.
Samir Şərifovun sözlərinə görə, Dövlət Vergi Xidməti üzrə proqnozların artıqlaması ilə icra edilməsinin böyük hissəsi, yəni 90%-ə yaxın hissəsi qeyri-neft sektoru üzrə gəlirlərin artması ilə bağlıdır.
Nazir vurğulayıb ki, Ərzaq təhlükəsizliyi proqramı çərçivəsində, əsasən də, dünyadakı ərzaq problemləri ilə əlaqədar cari ilin birinci rübündə 220 milyon manat vəsait ayrılmışdır.
Öz çıxışında maliyyə naziri bildirib ki, ümumi dövlət borcunun ortamüddətli dövrdə ÜDM-in 20%-i səviyyəsində saxlanılması, xarici dövlət borcunun ortamüddətli dövrdə 15 və uzunmüddətli dövrdə 10%-ə endirilməsi nəzərdə tutulub.
Bizə bu gün kifayət qədər böyük həcmlərdə borc vermək niyyətində olan beynəlxalq qurumlar var. Avropa İttifaqı artıq 2 milyard avro məbləğində borcun bizə verilməsi barədə niyyətini bildirib”, - deyə Samir Şərifov əlavə edib.
