Dünən gecədən başlayaraq yağan qara görə Muğanlı-İsmayıllı-Qəbələ avtomobil yolunun Basqal kəndi ərazisindən keçən hissəsində nəqliyyatın hərəkəti dayanıb. Bu haqda martın 18-də APA məlumat yayıb.
Hazırda bu ərazidə qarın qalınlığı 5-10 santimetr təşkil edir. Çovğun və buzlaşma nəticəsində 200-dən çox minik avtomobili, sərnişin avtobusları və yük maşınları yolda qalıb. Bildirilib ki, texnikaların köməyi və əl əməyi ilə kənarda qalmış avtomobillərin işə salınması üçün işlər görülür.
Bundan əlavə, Ağsu aşırımında, Muğanlı-İsmayıllı dolaylarında, Lahıc-Dəmirçi-Pirqulu yolunda da hərəkət çətinləşib.
